Schlacht bei Hattin

Schlacht bi Hattin au: Schlacht an de Hörner vo Hattin
Deil vo: de Chrieg zwüsche de Chrüzfaarer und de Ayyubide
Schlacht bi Hattin, Fantasiidaarstellig us em 15. Joorhundert
Datum 4. Juli 1187 Ort Hörner vo Hattin, in dr Nööchi vo Tiberias Usgang Siig vo de Ayyubide
Konfliktparteie
Köönigriich Jerusalem Groofschaft Tripolis Tämplerorde Johanniterorde	Ayyubide
Befählshaber
Guido vo Lusignan Raimund III. vo Tripolis Gérard de Ridefort	Saladin
Truppesterki
öbbe 22'000 Maa[1]	öbbe 45'000 Maa[2]
Verlust
vernichtend gschlaage	umbekannt

D Schlacht bi Hattin (mänggisch au Hattyn, Huttin, Hittin oder Hittim) am 4. Juli 1187 isch die grössti milidäärischi Niiderlaag vo de Chrüzfaarer gsi. As Folg si groossi Däil vo dr Outremer an d Muslim verlore gange, drunder s Köönigriich Jerusalem.

S Schlachtfäld het sich zwüsche Akkon und em See Genezareth befunde, südlig vo de böide Hügelspitz, wo men e d Hörner vo Hattin gsäit het. Mä cha vo dört us dr See Genezareth gsee.

Nume wenigi Ritter häi us dr Falle, wo dr Saladin de Chrüzfaarer gstellt het, chönne usbräche. Dr Köönig Guido und dr Groossmäister vo de Tämpler, dr Gérard de Ridefort, si gfangegnoo worde. Alli Ordensritter, wo überläbt häi, het dr Saladin lo umbringe.

Wil d Christe fast alli Ritter us de Festige abzooge häi, isch d Erooberig groose Däil vom Häilige Land für e Saladin liicht gsi. D Schlacht bi Hattin isch dr Aafang vom Ändi vo dr Chrüzritterherschaft im Häilige Land gsi.

1. ↑ Vgl. David Nicolle: Hattin 1187. Saladin's greatest victory. Osprey Publishing, Oxford 1993, S. 61.
2. ↑ Vgl. David Nicolle: Hattin 1187. Saladin's greatest victory. Osprey Publishing, Oxford 1993, S. 58.